حماتي وسلفي !!

زاد الاردن الاخباري -

مرحبا أنا عندي مشكلة كبيرة وبدها حل

أنا فتاة متزوجة من أشهر تقريبا وعلاقتنا منيحة وجيدة الحمد الله وأنا ساكنة فوق بيت حماي وحماتي فعليا مش إم زوجي وإنما مرة أبوه اللي ربتو بعد وفاة ابنو وعندها غيرو ولدين وبنت متزوجة ومسافرة وأنا حماتي كتير بتحبني وأنا بحبها بس للأسف شكلو السعادة مش مكتوبة لإنو من فترة أخو زوجي المسافر وهو أصغر منو بسنة صار مقيم عند بيت أهله وأنا بعاملو كتير منيح متل الأخ وهو منيح فجأة بدا يتغير ويعصب علي ويتجاهلني أولها فكرة حالي غلطانة وحاولت أعرف السبب وما عرفت فتجاهلت الموضوع وتركته للأيام ويوم وبالصدفة وهو عم يحكي مع أمو بالمطبخ سمعت إنو بحكيلها إنو هو معجب في كتيير ومش قادر يتحمل وبغار من أخو (زوجي) وإمو حاولت اتفهمو إنو أنا بعاملو منيح متل الأخ بس هو ما بفهم والإم بضل هو ابنها وزوجي ابن زوجة قبلها اتوفت وشكلها اتأثرت وبلشت تنكد علي وتحاول تفصل بيني وبين زوجي وكأني أنا السبب؟؟ شو أعمل يا رب والله بحب زوجي قد الدنيا ومش شايفه غيرو وبعاملو كزوجة وأم عشان أعوضو وهو مش متوقع شو السبب ومستحية أحكي أو حتى ألمح وحماتي اللي كنت اعتبرها متل إمي تخلت عني عشان ابنها وبتحملني المسؤولية، علما إنها ما بتعرف أني بعرف بس هادا اتبين من خلال تغير تصرفاتها وتحاول تلفت نظر زوجي لأمور تافهمة ما كان يهتملها أو يكون أخو زوجي في البيت لحالو وتناديني على البيت وبعدين أكتشف انها عند الجيران؟؟؟ شو الحل؟؟؟ يا رب الفرج زوجي بمنى الكلمة ما بقدر أعيش من دونه وهو كمان أرجوكم الحل