بطيخة أبو نبيل

قررت الذهاب لدكان الحاج علي لشراء بطيخة تحلو بها سهرتنا بوجود بعض الأصدقاء والجيران لكن ما أن قلت: "يا الله عن إذنكو هسا برجع رايح عالحج علي أجيب بطيخه" بدأت أتلقى العديد من التوصيات حول مواصفات البطيخة وبالذات عبارة "لا تجيب من البطيخ المخطط" ، ولا سيما توصيات بحكم الإقناع أدلى بها أحد أفراد العائلة: " كل ما كانت كبيره كل ما كانت أحلو وأطيب وأزكى" عدا عن نصيحة أبو نبيل: " هيه خالي والله جبت بطيخه من عند الحج علي بتون ون، بس تخبط عليها بتروح تنسطح بيدك، هيه خالي لد علي قول للحج علي بدي زي بطيخة ابو نبيل اللي أخذها من عندك مبارح وريح راسك" ، توكلت على الله وذهبت الى الدكان بعد التثقيف جيدا من الذين وصلوا إلى مستويات خبره نحسد عليها بموضوع البطيخ. وعند وصولي إلى الدكان وجدت أحدهم يفاصل الحاج علي " بربع كثير ، مهو عند جميل بعشرين. رد الحج علي: اسمع علي اذا البطيخ اللي عندي زي اللي عند جميل بدي اعطيك اياها ببلاش" فأجابه: " طيب بدي إياها حمرا عالسكين، فرد الحج علي: يزلمه كله أحمر يزلمه مشوراك بعيد والله غير تدمرك من ميتها" أيقنت وقتها بأن الحج علي متخوف من فشل اختبار البطيخة، أصر ذلك الرجل على فتح البطيخه لاختبارها، وبالفعل أمسك الحاج علي بالسكين وقال هاه بسم الله ليقتطع مثلث أشبه بشبه المنحرف وعندما وجدها قد نجحت بالاختبار قال الحاج علي" يزلمه أني بعطيك مش حمرا".

الآن جاء دوري بدأت بالسؤال " حج علي بدي أسألك ليش البطيخ المخطط مش مرغوب ؟" فرد: والله يا خالي: هذا السؤال متشعب لكن رح أعطيك إجابه مختصره، البطيخ المخطط مثل حكومتنا يعطيك من طرف الحز حلاوةً فقط وما يقارب ثلثين الحز ما فيه خير . سألته: طيب " ليش الناس بتزرعه" ليش ما يزرعوا من هذيك النوعيه؟" فرد: خالي برضو بدي أعطيك مثال على صورة إجابه: هذاك اليوم شفت عالتلفزيون النائب الشوبكي لما سحب مسدس على النائب مراد قدام الناس؟ قلتله: آه بس هذا بعد ما صفقه بالكندره ، قال: عليك نور.

طيب شفت الطوبرجي قصدي النائب يحيى السعود لما شلح الكندره بالمجلس وكان بدو يضرب زميله النمري؟ طيب شفت السعود لما كان لابس فوتيك مخطط بالمجلس؟ طيب أقربلك الصوره أكثر، شفت السعود باليوم اللي بلبس فيه فوتيك بالمجلس والله أعلم والله أعلم انه بكون جاي يحارب ومسدسه كمان على جنبه؟ والله أعلم يا خالي أنه الحكومه مسلحه جماعتهم. والله يا خالي وبالله عليك لا تسألني ليش الناس بعدها بتزرع البطيخ المخطط لأنه الناس ما بتزرعه هيك بيجي مزروع جاهز مع حقنة هرمون حكومي. يا رجل خذلك مثل بطيخة أبو نبيل تبعت مبارح ولا ترجع علي الله يرضى عليك. وأنا بقول: والله أعلم إنه أبو نبيل سائل الحج علي نفس السؤال...ويبدو أن بطيخة أبو نبيل رح تنتشر بالبلد وبمواصفات غامضه.

ما بدنا نوّن ولا نطبل لأنه الحل الوحيد "عالسكين يا بطيخ"..!