أوعكم يا ناس تصدقوهم !!

لا تصدّقوهم ..

أوعكم يا ناس تصدّقوهم !

مهما قالوا إنه في عنا حريات إعلامية ، أو صحفية ، أو أدبية ، أو كتابية : رح نضلّ مكلبشين بالخوف والرعب والأمن والدّرك والسّجون .. ولو شو ما الواحد كتب ، رح يضلّ سيف الرّقيب فوق راسه ويستنّاه عالنّقرة !

الزميل (جمال المحتسب) صاحب موقع (جراسا نيوز) وبعد ما نشر هذا الخبر ، اللي مش موجود حالياً بعد ما (تهكّرت) الصّفحة ؛ تمّ اعتقاله !

يعني إحنا كنّا نتمسخر من قبل أكم يوم إنه في (ناشط) سعودي تمّ اعتقاله عشان عنده بعض (الكتب الممنوعة) زي ما قالت وسائل الإعلام السعودية ؛ وبعدين نتفاجأ بهذا الخبر الغريب اللي بثبت للعالم كلّه إنه إحنا آخر ناس عندهم حريات صحفية وإعلامية زي ما بدهم !

المفروض إنه حرية الرأي مصونة ومحميّة بموجب القانون والدستور ، وهيك بتحكي كلّ المواثيق الدوليه المعنية بحقوق الإنسان ، وخاصة العهد الدولي الخاص بالحقوق المدنية والسياسية واللي وقّعت وصادقت عليه حكومتنا !

اعتقال الزميل (جمال المحتسب) من قبل محكمة أمن الدولة هو مخالفة دستورية وجريمة حقيرة بعاقب عليها القانون المحلي والقانون الدولي ؛ المواطن مخنوق ومجلوط ومضغوط وعلى الأقلّ إله حقّ التعبير في كافة وسائل الإعلام المرئيّة والمسموعة والمكتوبة والإلكترونية، وإله الحقّ باستسقاء المعلومات وجمعها ونشرها حسب التشريعات والقوانين الناظمة للعمل الصحفي .. هذا الكلام موجود في كلّ دول العالم على فكرة !

طبعاً من واجبات الدّولة إنها تردّ على أيّ مزاعم أو أقوال أو معلومات مش مزبوطة ومش دقيقة ؛ ولكن حجز حريّة الرأي جريمة !

وتكميم الأفواه كارثة !

وإخراس الأصوات مصيبة !

هذا اللِّي صار ضربة موجعة للمواقع الإلكترونية كلها !

عفواً ؛ بس على أيّ أساس يتحوّل لمحكمة أمن الدّولة ؟!

إحنا كلّنا ، جميعاً ، كمطالبين بالكرامة والحقوق والحريات والأمن والراحة والعدل ورفع الظلم السيء الأسود ؛ نطالب مطالبة فوريّة وعاجلة بإلغاء محكمة أمن الدولة لأنه هذا الإشي فيه مُخالفة دستورية ، وبنطالب إنّه -كمتّهم- يتحوّل للقضاء المدني ..

مش العسكري !

المفروض ينحطّوا جماعة السرقات والنهب في السجن !

المفروض إنه النصابين والكلاب الفاسدين الشبعانين المتخمين اللي عم بشلّوا بأمل الوطن همّة اللي يعتقلوا !

المفروض إنه اللي باعوا البلد وأراضي البلد وأخذوا خيرات ألله فلوس ؛ نشوفهم همَّة ورا الحبوس والحيطان !!

.. مش الناس المحترمة الصادقة يا مسؤولين !

من هون ؛ بنطالب بالإفراج الفوري عن الزميل المعتقل (جمال المحتسب) ؛ مع تقديم الإعتذار والأسف الرسمي من الحكومة للكيان الصحفي كاملاً ؛ لإنه اعتقال أي صحفي هو بمثابة اعتقال لكافة الصحفيين وتقييد للحريات !!

(ملاحظة: لأول مرة في حياتي أكتب مقالاً بالعامية .. السبب هو أنني فقعت) !!